Puleaina o le faanofoesea ma le vaavaaia i totonu o Niu Sila

Ina ia fesoasoani e taofia le pepesi solo o le COVID-19, e tatau i tagata e taunuu mai i Niu Sila ona nonofo i nofoaga o loo pulea ma vaavaaia ai le faanofoesea mo le umi e lē itiiti ifo ma le 14 aso. O le a siaki foi tagata malaga mo le COVID-19 i le vaitaimi o loo nonofo ai i nofoaga nei.

Managed Isolation Allocation System

O le Managed Isolation Allocation System o se faiga i luga o le initaneti mo tagata e malaga mai i Niu Sila e faamautu mai ai so latou avanoa e nonofo ai i se nofoaga o loo pulea ai le faanofoesea, a o lei ulufale i se faigamalaga.  O le taimi lava e mae'a ai ona lesitala o latou avanoa i luga o le initaneti, o le a faatulaga ese loa se potu i le nofoaga e pulea ai le faanofoesea mo le tagata malaga poo se aiga foi o loo malaga faatasi mai, ma o le a tuuina atu i ai se voucher e faaali i le malaevaalele pe a tuua se faigamalaga mo Niu Sila. 

E mafai ona maua le voucher mai le Managed Isolation Allocation System i luga o le initaneti mai le 8am, aso 5 Oketopa. O le a faasalalauina le link e maua ai le faiga e lesitala ai i luga o le initaneti i le  upega tafailagi a le Managed Isolation and Quarantine (MIQ) i le taimi lava lea.

Tulaga moomia faatulafonoina e maua ai se voucher

Afai e te taunuu i Niu Sila i le vaitaimi faatagaina ua faatulaga - mai le 8am, aso 5 Oketopa 2020 i le 11.59pm, aso 2 Novema 2020 – e fautuaina malosi oe  ia iai sau voucher e faamaonia ai ua uma ona faamautu se nofoaga e te agai i ai i nofoaga ua pulea ai le faanofoesea ae e te lei ulufale i se faigamalaga. 

O tagata malaga e taunuu mai i le malaevaalele i le vaitaimi faatagaina ua faatulaga e aunoa ma se voucher, e mafai pea ona latou ulufale i se faigamalaga.  Peitai e ono umi se taimi e faagasolo ai le siakiina o pepa malaga, a o taumafai le aufaigaluega a le kamupani vaalele e galulue ma le vaega a le malo o Niu Sila o loo Pulea ma Vaavaaia le Faanofoesea, e faamautu se nofoaga mo i latou i nofoaga e faanofoesea ai pe a taunuu.

Ua faatulafonoina tagata malaga ia iai se voucher a o lei malaga ese pe afai e taunuu mai i NIu Sila i le te'a o le 12am, aso 3 Novema 2020.

Faaaogāina o le Managed Isolation Allocation System

Na o le Gagana Peretania o loo mafai ona maua ai i le taimi nei le Managed Isolation Allocation System.  E mafai ona e talosaga i se tasi o lou aiga, uo poo se sui o se kamupani vaalele e tautala i le Gagana Peretania, pe mafai ona latou faaaogāina le Allocation System mo oe.  E mafai ona latou fesoasoani e saili se voucher mo oe, poo oe ma lou aiga o loo tou malaga faatasi i Niu Sila.

E tatau i le tagata o loo faatumua lau lesitala ona faaaogā faamatalaga ia te ia lava, e fai ai se account i le Managed Isolation Allocation System. E mafai ona latou toe faaaogāina le account lava lea pe a moomia ona latou lesitalaina se isi tagata e toatasi poo se aiga o loo malaga i Niu Sila.

O le taimi lava ua faamaonia ai i luga o le initaneti se nofoaga e te faamautu i ai, o le taimi foi lea o le a tuuina atu ai lau voucher e mafai ona lolomi pe kopi i lau telefoni feaveai.  O le a imeli atu foi i le tagata na faatumua lau lesitala se kopi o lau voucher, ma o le a ia faaoo atu le imeli ia te oe.

Lesitala

O loo maua le auala e mafai ai ona lesitala o se 'individual registration' mo se isi o loo malaga toatasi, poo le ‘family registration.' O le ‘family registration’ o le auala lea mo aiga toatele, ulugalii ma isi tagata o loo malaga o se vaega i se faigamalaga e tasi mo Niu Sila, ma e mananao e nonofo faatasi i se potu mo le vaitaimi atoa o iai i le nofoaga o le a faanofoesea ai.

Vouchers

Afai na e faatumua le ‘individual registration’ o le a tuuina atu ia te oe le voucher e tasi. Afai na e faatumua le ‘family registration’, o le a tuuina atu se Managed Isolation Allocation Voucher e tasi mo se vaega.  O le a lisi i le voucher igoa o tagata uma o loo i se vaega ua uma ona faatulaga se avanoa e nonofo ai i le nofoaga o loo pulea ai le faanofoesea.  E lē mafai ona faaaogā le voucher i le malaevaalele e se isi tagata. 

O le a talosagaina oe e le kamupani vaalele e faaali lau Managed Isolation Allocation Voucher pe a siaki pepa malaga poo le taimi e ulufale ai i se faigamalaga mo Niu Sila.  E ono talosagaina foi oe i le malaevaalele o loo faaauau ai se faigamalaga mo Niu Sila e faaali le voucher. 

E mafai ona fai se kopi o le voucher i se laupepa pe kopi i lau telefoni feaveai. 

Moomia se fesoasoani?

Faafesootai le MIQ Service Centre i le 0800 476 647 (totonu o Niu Sila) poo le +64 4 931 5720 (fafo atu o Niu Sila). E ono totogi se tupe. E maua auaunaga mo faamatalaupu i le laina telefoni lava lea.

E mafai foi ona tuuina atu lau faafesili i le MIQ Service Centre i le allocationsupport@miq.govt.nz pe tuuina atu i leupega tafailagi a le MIQ. E tatala le Service Centre mai le 0800 – 2200 (NZST), fitu aso o le vaiaso.

Tupe e totogi

E leai se tupe e totogia mo se voucher.  Peitai, e ono iai nisi tagata e tatau ona totogi le nonofo ai i nofoaga o loo pulea poo vaavaaia ai le faanofoesea.  Tagai i le Charges for managed isolation mo nisi faamatalaga. 

Tuusaunoaina

E mafai e soo se tasi ua toe foi mai i Niu Sila ona talosaga mo le tuusaunoaina.  Peitai, e faatoa faataga le tuusaunoaina i ni tulaga e mafua ona o mafuaaga lē maalofia.  O le tele o tulaga ua tuusaunoaina ua faatagaina i tagata o loo malaga faatasi ma tamaiti laiti, tagata o loo malaga faaauau, poo tagata e moomia le tausiga i le falemai. 

Mo nisi faamatalaga i talosaga mo le tuusaunoaina mai nofoaga o loo pulea pe vaavaaia ai le faanofoesea, tagai i le Exemptions from isolation.

Fesili & Tali i le Managed Isolation Allocation System