Vagahau Niuean

Tau Hatakiaga Uho ma e haau a nofoaga ke he Kaina Puipui MIQ Facility po ke (Isolation Facility) GFX

Fakaalofa lahi atu

Ko e falu ia mutolu hane fa e teuteu ke o atu ke he tau kaina nonofo puipui ha kua fakamooli mai he tau tivi kua moua e koe e gagao Covid-19 po ke  ko koe taha, ne kua fai matutakiaga mo e taha tagata ne kua fakamooli kua moua e Covid-19.

Ko e tau kakano uho he tau kaina puipui ke leveki e tau tagata ke ua moua he COVID-19 ato liliu ke he tau heagaapi ha tautolu.

Ko e MIQ ko e taha fakatokaaga mahuiga ke taofi e totolo he COVID mo e puipui e ha tautolu a tau heagaapi.

Fakaaue lahi, ha kua omaoma mo e muitua a koe ke he tau hatakiaga ke leveki mo e puipui e haau a tau magafaoa, tau matakainaga, ha tautolu a tau tagata gahua mo e tau heagaapi.

Kia mailoga e tau hatakiaga nei – ke lagomatai aki e haau a magaaho nofo atu ke he MIQ

Tau mena ke fatokatoka ke uta

GFX

Kua lata ia koe ke tamai oti e tau koloa ne kua lata ia ma e haau a moui he tau aho taki taha tuga a nei:

Tau mena tui – ke lata ma e ua e faahi tapu

Tau tegavai mo e tau vai: Fakamolemole, kia uta tumau mo koe e tau tegavai po ke tau vai ne kua lata ma e haau a gagao.

Tau koloa ikiiki – tuga e vai kana nifo, mo e kana nifo, tau hifi hafe mo e tau koloa ma e tau gagao fakafifine.

Tau mena ke fakafiafia mo e taute e koe po ke haau a tau tama. Tamai e ha lakau hila ne maeke ia koe ke fakatumau e matutakiaga mo e tau magafaoa, tau matakainaga mo e keli aki foki e tau magaaho mai he haau a poko nofo.     

Tau Fakatokatokaaga he MIQ

GFX

Pete ni he fakatoka e tau kaina puipui ke he tau hotela, ka e nakai he naia kua fakagahuahua tuga e mahaniaga he tau hotela.

Poko

●          To nofo a koe ke he poko ne kua fakatoka ke he kaina puipui.

●       To uta foki e fakatokaaga nei ke he numela tagata ne fakalataha mo koe.

TV mo e WIFI

●       To nakai fai totogi e TV mo e moua noa e Wi-Fi

Tau Kafu

●       To fai kafu ka e maeke ia koe ke tamai falu mena foki ke fakahagahaga mitaki aki e haau a nofo.

Tau Kai:

●       To nakai totogi e haau a kai pogipogi, kai laa mo e kai afiafi. Ko e tau kai lafi mai ki luga, to totogi e koe.

●       To taatu e tau kai mo e tuku ki fafo  he haau a gutuhala.

●       To lali fakalahi e tau tagata gahua ke moua atu e tau kai ke lata ia ma e haau hatakiaaga mena kai, ka e nakai pehē he naia to maeke ke fakamooli tumau e haau a poaki.

Tau koloa ota ke taatu:

●         Maeke ia ko e ke ota e tau koloa mai he tau maukoloa po ke tau fale koloa lalahi ne tata atu ke taatu ke he kaina puipui. Mailoga, ko koe ka totogi.

●       Mailoga, to nakai maeke e haau a magafaoa he Papahi 4 mo e Papahi 3 ke taatu e ha koloa (ko e tau vai mo e tau tegavai ni ne kua maeke ke taatu).

Tau Levekiaga:

●       Nakai fai lekua e tau kaina puipui.

●       Ko lautolu ne gahua ke he tau kaina puipui ko e tau pulotu mai he Faahi Malolō Tino, tau tagata gahua ma e hotela mo e tau tagata gahua fakatufono.

Tau Hea Telefoni:

●        Nakai fai totogi e tau ui telefoni mai he taha poko ke he taha poko, pihia mo e tau fakaholaga he hotela.

●        To totogi e tau ui telefoni haau ki tua mai he hotela ke he tau totogi kua fakatoka he hotela.

●          Maeke ia koe ke fakaaoga noa e WiFi ai fai totogi mai he haau a telefoni utafano mo e falu lakau hila ke matutaki mo e haau a magafaoa.

Tau Tagata Fakaliliu Kupu:

●       Fakamolemole fakailoa ke he tau tagata gahua kaeke ka manako a koe ke fai tagata fakahokohoko kupu ke maeke ia lautolu ke fakatokatoka ke moua a ia.

KIA MAHANI TOTONU KE HE TAU TAGATA GAHUA

Maama e mautolu ko e mena uka mo e loga e tau paleko ke he manamanatuaga ka nofo atu ke he tau kaina puipui.

Ko lautolu e tau tagata gahua ko e tau pāpā tau ha Niu Silani ke he totokoaga he COVID-19, ne kua fakamooli ke leveki atu ki a koe ke he tau puhala kua mitaki mo e lata. Fakamolemole, kia muitua mo e fakalilifu e ha lautolu a tau puhala gahua.

Hanei e falu a tau matafakatufono uho ne kua lata ia koe ke muitua ka nofo ke he MIQ:

1/ Ua toka

Kua lata ia koe ke nofo he kaina MIQ ke he 14 e tau aho ne kua fakatoka ki ai mo e nakai maeke ia koe ke toka e kaina nei ma e ha falu kakano foki.

2/ Nofo he Poko haau

Kua lata ia koe po ko hai foki ne nonofo fakalataha mo koe ke nonofo taha, ai toka e tau poko he tau magaaho oti, ke lagomatai ke puipui e totolo he COVID-19

3/ Ai fai Tagata Ahiahi

To nakai maeke ke fai tagata ke ahiahi atu ki a koe. Ua fakaatā ha tagata ke finatu ke he haau a poko mo e ua finatu a koe ke he poko he ha tagata ato pehē ko lautolu ia kua putoia ke he haau a fufua.

4/ Tui e Pa Gutu

Nākai maeke a koe ke tui e ha pa gutu ne tamai e koe he haau a kaina. Ko e tau pa gutu ni ne atu he kaina puipui ne maeke ia koe ke tui.

Tui e pa gutu haau to hafagi e gutuhala kaeke ka fai fekau. Putoia e tau vahega mena tuga ka hafagi e gutuhala ke moua e kai haau, po ke tuku e tau taga veve ki fafo mo e tau aponimene tuga e tivi COVID-19.

Tui e pa gutu haau kaeke ka toka e poko ke finatu ke fakamatagi po ke magaaho ula tuga mo e kua fakatoka ki ai.

5/ Kia Tumau ke Fakavehā Ua e Mita

Fakavehā ua e mita mai he falu a tagata, kaeke ka toka e koe e poko haau. Kia mailoa ke fakavehā mamao ke he tau magaaho oti.

6/ Kai i loto he haau a Poko

Kua lata ia koe ke kai ki loto he haau a poko ke he tau magaaho oti. Fakamolemole, ua kai i fafo he haau a poko.

7/ Fakamau hifo e magaaho ke finatu ke Ula i fafo

Ua ula i loto he haau a poko.

 Kaeke ka manako a koe ke ula – fakamau hifo mua e magaaho haau ne manako ke he tau tagata gahua ke fano ke ula. To hataki atu e lautolu a koe e puhala ke fakamau hifo e haau a magaaho.

 To fai matakavi pauaki ne maeke ia koe ke finatu ke fakamatagi ki ai he kaina puipui. To fakailoa atu he tau tagata gahua kaeke kua lata ia koe ke fakamau hifo e magaaho haau ne manako ke finatu ke fakamatagi ki ai.

8/ Ua foaki e ha mena taha

UA FOAKI HAAU a tapaka ke ula taha, a afi ke tugi e tapaka he taha, ha mena kai ke kai taha, po ke ha mena inu ke inu taha po ke ha mena mo e falu tagata.

9/ Fakailoa age ke he tau tagata gahua kaeke kua gagao a koe

Manatu, kaeke ka gagao po ke tatalu a koe ke he ha magaaho, fakamolemole fakailoa age ke he tau tagata gahua ke maeke ia lautolu ke foaki atu e tau lagomatai fakaekekafo ne kua lata.

Maeke ia koe ke ui atu mai he telefoni he poko haau ke he tau tagata gahua mai he faahi malolō tino ne hā hā ke he kaina puipui ia ke moua falu lagomatai.

 Ua finatu ke he tagata ne tali mo e fakafano fekau he hotela.

Ko e haau a Malolō Tino mo e Moui Tupu Olaola

Mailoga, ko e mena tupetupe tuai ni, kaeke ka nofo atu a koe ke he kaina puipui ne kua fakatoka ki ai.

To uka ke he falu a tau tagata, ko e mena ia kua lata ia koe ke leveki e haau a moui malolō ke he haau a manamanatuaga mo e haau a malolō tino.

To tivi ke he tau magaaho kua fakatokatoka e haau a moui malolō tino mo e manamanatuaga ke he haau a nofo atu ke he kaina puipui.

Fai Wi-Fi fakaaoga noa ai fai totogi ke he laulahi he kaina puipui, fakahooho atu ke matutaki ke he taha he tau tagata gahua ke maeke ke lagomatai a koe.

Hā hā ki loto he tau potaaga koloa ka moua e koe ka hoko mai ke he kaina puipui e falu he tau kautaha ne maeke ia koe ke matutaki ki ai ke moua falu a tau lagomatai.

Tau lekua ne kua lata ke iloa

Hā hā i ai e falu puhala ne maeke ia koe ke taute kaeke kua nakai fiafia a koe ke he haau a nofo atu ke he MIQ.

To moua e koe e tau numela telefoni he falu a tau tagata gahua ki loto he kaina puipui ke maeke ia koe ke matutaki fakamafiti ke moua falu a tau lagomatai. Hā hā ki ai foki e tau hatakiaga ne kua fakatoka ma e tau hokotaki ka ta.

Ke FAKATOATOA ATU, fakamolemole kia muitua ke he tau hatakiaga he Faahi Malolō Tino.

1)     Holoholo tumau e tau lima haau

2) Tui e pa gutu ke puipui e haau a fofoga

2) Fakaaoga e tracer app ke fakamau hifo aki e tau matakavi ka fano a koe ki ai.

3) Fano ke tivi, kaeke ka gagao po ke fai fakamailoga fulū a koe.

KE FAKAOTI AKI

Amanaki ke mafola mo e haohao mitaki e haau a nofo atu ke he kaina puipui. Iehova he vahā loto, kia tumau e mahani puipui.

Ke moua e falu fakalaulahiaga hagaao ia ke he haau a nofo atu ke he kaina puipui MIQ – to maeke ia koe ke totou ke he potaaga koloa ka moua e koe ka hoko atu ki ai.