Puna‘oa Faamatalaga Tāua

Nofoaga o loo puleaina le faanofoesea mo ē ua toe taliu mai i Niu Sila

Matou te faafetaia lou lagolagoina o le loaloa o le atunuu i le tausisia o le saogalemu o tatou tagata ma afioaga. O lau
pitolaau o loo faatino ua e fesoasoani ai e taofia le pepesi o le COVID-19 i totonu o Niu Sila.

 

Afio mai, tala mai aao: talofa lava

Kia ora, afio mai i Niu Sila, malo le malaga manuia.

A o salalau pea le faama‘i COVID-19 i le lalolagi atoa, sa vave lava ona faatino i totonu o Aotearoa Niu Sila faiga uma e faaitiitia ai aafiaga o le COVID-19 i totonu o tatou afioaga. Na aofia ai le faamalosia o tagata uma i le atunuu atoa e nonofo i fale ma faagasolo ai lapataiga i vaega e 4 mo le tali atu i le COVID-19.

E toalaiti lava tagata ua faamaonia ua aafia i le COVID-19 i le taimi nei i totonu o Niu Sila ma o loo matou taumafai ia tausisia pea tulaga nei. Mo le tausia o le saogalemu o le atunuu, ua matou faatinoina se faiga e ta‘ua o le Managed Isolation and Quarantine (MIQ) i le tuaoi e taofia ai tagata ua aafia i le COVID-19 mai le sopoia ma ulufale atu i totonu o tatou afioaga.

O lou toe taliu mai talu ai nei mai se isi atunuu, o lona uiga ua e iai i se tulaga lamatia e feaveai ai le vairasi ma ua e ono aumaia ai le faama‘i i totonu o Niu Sila. O lona uiga o le a tatau ona e nofo i se nofoaga o loo puleaina ai le faanofoesea mo le umi e lē itiiti ifo ma le 14 aso.

Afai o iai se mafuaaga e te talitonu ai ua e maua i le COVID-19, o le a faanofoesea oe i se nofoaga e puleaina ai le vaavaaia mo le umi e lē itiiti ifo ma le 10 aso, mai le taimi na amata ai ona alia‘e āuga o le COVID-19 poo le aso na fai ai lau siaki. E tatau ona e malosi lelei mai āuga o le COVID-19 mo le umi e lē itiiti ifo ma le 72 itula ae e te lei tuua le nofoaga.

O le nofo ai i nofoaga o loo puleaina ai le faanofoesea o se faiga faatulafonoina e tatau ona usitaia i lalo o le COVID-19 Public Health Response (Air Border) Order 2020, na faamalosia i le 11.59pm aso 22 Iuni 2020.

O nofoaga nei o faletalimalo ma o le a tuuina atu le tele o fesoasoani i le taimi atoa e te nofo ai. O le a matou faia galuega uma ina ia mautinoa lou nofo lelei i nofoaga nei. A o e nofo ai i nofoaga nei, faamolemole ia e agalelei atu i le aufaigaluega a le faletalimalo, soifua maloloina ma isi, ma mulimulitai i fautuaga, taiala poo faatonuga ua latou faailoa atu.

O loo maua i faamaumauga nei faamatalaga e aogā i le taimi atoa o loo e nofo ai, e aofia ai auala e maua ai lou saogalemu, ma tulaga e tatau ona e faatinoa a o lei tuua le nofoaga. E faafou tulaga ma faamatalaga i taimi uma ma e ono faia ni suiga i le vaitaimi o loo e nofo ai.

O loo iai le aufaigaluega i totonu o nofoaga nei e te talosaga i ai mo se fesoasoani. Faamolemole talanoa i le aufaigaluega pe afai o iai ni au fesili poo ni atugaluga i ni tulaga o lou nofo ai.

Malo le faamalosi ma le lagolagoina o la tatou galuega fai faatasi.

Fesootaiga

E tatau ona e faafesootaia muamua le aufaigaluega i totonu o nofoaga i soo se fesili poo ni atugaluga. O loo iai isi nofoaga e mafai ona e sailia mo faamatalaga ma fesootaiga:

Mo faamatalaga i mataupu e fesootai ma femalagaiga, e aofia ai tulaga o loo faataga i le tuaoi ma mataupu tau femalagaiga mo tagata taitoatasi, faamolemole tagai i le upega tafailagi a le Immigration New Zealand o loo maua ai faamatalaga lata mai:

www.immigration.govt.nz/about-us/covid-19(external link)

Afai e te talitonu e iai se tasi o loo solia tulafono poo faia ni tulaga e ono pepesi ai le COVID-19, faamolemole lipoti tulaga nei i le aufaigaluega i totonu o nofoaga o loo faanofoesea ai - e mafai foi ona e lipotia soo se faaletonu i le:

www.covid19.govt.nz/compliance(external link)

E iai lau aiatatau e saili ai se fautuaga a se loia e te totogia (tagai i faamatalaga e uiga i au aiatatau o loo ta‘ua i le Pepa Faapipii 3).

Aisea e tatau ai ona ou nofo i nofoaga o loo puleaina ai le faanofoesea

E mafai ona pepesi le COVID-19 mai le tasi tagata i le isi. O lou malaga mai talu ai nei mai atunuu mamao o lona uiga ua ono lamatia oe i le vairasi. Atonu e lē vave ona e ma‘i ai ma e umi se taimi faatoa alia‘e āuga.

O lou nofo ai i nofoaga o loo puleaina ai le faanofoesea mo le umi e lē itiiti ifo ma le 14 aso, o se faiga e mafai ai ona matou faanofoesea oe e taofia ai le tupu ma le ola o le siama ia te oe. O se auala lea e mafai ai ona matou pulea lelei le ono pepesi o le faama‘i i totonu o afioaga i Niu Sila ma tausia ai lou saogalemu ma ē pele ia te oe.

E faasā ona e tuua le nofoaga i le taimi atoa o loo e nofo ai.

Manatua:

  • O le faanofoesea ua na o se faiga lē tumau e puipuia ai oe, o tagata o loo lata ane ia te oe ma o tatou afioaga mai le COVID-19.
  • Ua faatulafonoina lou nofo i se nofoaga o loo puleaina ai le faanofoesea mo le umi e lē itiiti ifo ma le 14 aso, faamae‘a suesuega tau soifua maloloina ma faamaonia e te lē o iai i se tulaga lamatia e ono aafia pe faapepesi atu ai le COVID-19 ae e te lei tuua le nofoaga.

O i latou o loo faifaipea le maua i āuga o le COVID-19, e ese le nofoaga e vaavaaia ai.

O le ā le puleaina o le faanofoesea?

E tele nofoaga i totonu o Niu Sila ua mae‘a ona tapena e le malo e puleaina ai le faanofoesea o tagata pe a taliu mai atunuu mamao. O le fua lea o loo faatino i lo tatou tuaoi ina ia mautinoa o tagata o loo ulufale mai i totonu o Niu Sila i le taimi nei, latou te lē o aumaia le COVID-19 mai atunuu mamao i totonu o afioaga.

O nofoaga nei o loo pulea ai le faanofoesea ma le vaavaaia, e saogalemu ma e tele fesoasoani e maua mo oe ma lou aiga. Latou te vaaia lelei tagata ua toe taliu mai e maualalo tulaga e ono aafia ai i le COVID-19 i le taimi faatoa taunuu ai i totonu o Niu Sila, mo se faataitaiga o i latou na pasia siaki tau soifua maloloina pe leai ni āuga o le COVID-19 o maua ai. O nofoaga o loo puleaina ai le faanofoesea o faletalimalo, o loo faafaigaluega ai sui o le soifua maloloina, aufaigaluega a faletalimalo ma sui mai matagaluega a le malo.

E 14 aso o le a nonofo ai le toatele o tagata i se nofoaga o loo puleaina ai le faanofoesea.

E oo mai i le taimi nei e silia ma le 50,000 tagata sa sologa lelei lo latou nonofo ai i nofoaga o loo puleaina ai le faanofoesea ma le vaavaaia, ma ua mafai ona faatasia ma aiga ma afioaga.

O afea e mafai ona e tuua ai le nofoaga?

E moomia lou nofo i le nofoaga o loo puleaina ai le faanofoesea mo le umi e lē itiiti ifo ma le 14 aso. E amata ona tau mai le taimi e te taunuu ai i Niu Sila, poo le taimi na e ulufale ai i le nofoaga o loo puleaina ai le faanofoesea pe afai e te lei mulimulitai i faatonuga e fai se ufi fofoga ma tausi le mamao mai isi tagata.

Afai ua faataga ona faatasi se tasi o lou aiga poo se tasi o loo fesoasoani ia te oe i totonu o lou potu, pe e te fesootai ma se tasi ua aafia i le COVID-19, o le a toe amata le isi 14 aso e faanofoesea ai oe.

O le toatele lava o tagata e moomia le iai o se faamaoniga e lē o aafia i le COVID-19, ma se faamaoniga a le foma‘i e maualalo tulaga e ono aafia pe pepesi ai le COVID-19 mai ia te oe, faatoa mafai lea ona e tuua le nofoaga.

O tulaga maualalo e lē ono aafia pe pepesi ai le COVID-19 e aofia ai se faamaoniga:

  • Sa e nofo i se nofoaga o loo puleaina ai le faanofoesea mo le umi e lē itiiti ifo ma le 14 aso.
  • E lē o vevela lou tino i le maualuga e 38°C pe sili atu.
  • O le tele o taimi na siaki ai oe, na faamaonia lava e te lē o aafia i le COVID-19.

E ono faamalosia lou nofo ai mo le umi e 28 aso pe afai e te musu e fai sau siaki o le COVID-19, poo le leai o se manatu i le fomai e maualalo tulaga e ono lamatia ai oe i le faama‘i.

E tatau ona e faamalieina tulaga nei ona mafai lea ona e tuua le nofoaga, ma ua tuuina atu se tusi e faamaonia ai ua mae‘a ona e nofoia le umi sa tatau ai ona faanofoesea oe i nofoaga nei. E moomia foi le faatumu o le Pepa Faatumu pe a Tuua le Nofoaga o loo Puleaina ai le Faanofoesea. E maua le fesoasoani mai se tausimai e faatumu ma saini ai le pepa lenei.

Mataituina tulaga o lou soifua maloloina i taimi uma

A o e nofo ai i nofoaga o loo puleaina ai le faanofoesea o oe, o le a siaki i le tele o taimi tulaga ua iai lou soifua maloloina. E tāua siaki mo lou soifua manuia ma le manuia o isi o lata ane. E fesoasoani foi siaki o loo faia matou te iloa ai togafitiga e faia mo oe pe a e pesia i le vairasi.

Faamolemole utagia faatonuga e tuuina atu e le aufaigaluega. O loo latou taumafai e tausia oe ma faamautinoa o loo aogā ma lelei siaki tau soifua maloloina.

E faalua ona siaki oe mo le COVID-19

Aso 3: O le siaki muamua mo le COVID-19 e faia i le aso lona 3 talu ai o le umi e masani ai ona alia‘e faama‘i i tagata pe a pesia o le 5 aso, ma e faitauina ai le 2 aso na faigamalaga ai.

Aso 12: Matou te toe faia le isi siaki i le aso lona 12 talu ai e ono umi se taimi faatoa alia‘e le faama‘i i nisi tagata. Matou te faaaogāina le siaki lona lua e iloa ai ma le mautinoa le maualalo o tulaga e ono aafia ai se tasi ma mafai ai ona tuua le nofoaga pe a uma aso e 14.

E aofia i siaki le salu mai o sina vavale mai le pito i tua i totonu o lou isu. E lē manaia i le faalogo ae e lē afaina ai. E lē atoa se minute e fai ai le siaki.

Tagai i le Pepa Faapipii 1 mo nisi faamatalaga i siaki ma iuga.

Afai e te musu e fai sau siaki o le COVID-19, ma e lē o maualalo tulaga e te ono aafia ai, e ono faanofoesea oe mo le umi e oo atu i le 28 aso.

E tatau ona e mulimulitai i faatonuga mai le foma‘i poo le sui o le soifua maloloina tau puipuiga, i le taimi atoa o loo e nofo ai. E lē gata i siaki o le COVID-19, ae o le a moomia foi ona e faia se suesuega tau soifua maloloina. A talosagaina oe e fai se personal protective equipment (PPE) e pei o ufi fofoga i soo se taimi a o e nofo ai, e tatau ona e usitaia lea tulaga.

Tagai i Pepa Faapipii e maua ai faamatalaga i le faia o siaki.

E maua le fesoasoani i taimi uma

E tāua lou faamaoni i tulaga o lou soifua maloloina a o e iai i nofoaga o loo puleaina ai le faanofoesea. O se auala pito sili lea ona lelei e pulea lelei ai ou manaoga tau soifua maloloina ma le soifua manuia.

E maua le fesoasoani mai le aufaigaluega a le soifua maloloina o loo galulue ai i nofoaga o loo e nofo ai.

  • Afai e te faalogoina ua e ma‘i, faamolemole nofo i lou potu ma vili le aufaigaluega o loo galulue i nofoaga nei. O le a latou fautuaina oe i le isi gaioiga e tatau ona e faia.
  • Afai ae alia‘e i se taimi o e nofo ai āuga o le COVID-19 o le fiva, tale, tau lē lava le mānava pe tiga le faaī, faamolemole manatua e te nofo i lou potu ma faailoa vave i le telefoni tulaga nei i le aufaigaluega o loo galulue i nofoaga nei. O le a latou faatulaga se taimi e suesue ai oe e se fomai o loo faigaluega i nofoaga nei.

E ui i le faigata o le faanofoesea, ae o se faiga tāua mo le tausia o le saogalemu i Niu Sila ma tineia ese ai le COVID-19. O le faanofoesea o oe ma le mataituina o lou lava soifua maloloina, o se tiute tāua lea ua e faia e ausia ai sini autu nei e lua.

Tagata ua masalomia ua aafia i le COVID-19

Afai o iai se tasi i totonu o le nofoaga ua masalomia le aafia i le COVID-19, o le a talosagaina oe e te nofo i lou potu se‘i toe maua atu se isi faaaliga. Matou te iloa e lē faigofie lea tulaga peitai e faamuamua ia i matou lou saogalemu.

Afai ae faamaonia ua aafia se tasi o loo iai i le nofoaga i le COVID-19, o le a faanofoesea loa tagata ua aafia e faatali ai le taimi e momoli ai i se nofoaga e vaavaaia ai. O le a toe faia isi galuega e faamamā ai le nofoaga.

Manatua e tausi le mamao e 2 mita mai isi i le taimi atoa o loo e nofo ai e taofia ai lou faalatalata i soo se tasi tou te lē o nonofo faatasi.

Auaunaga i totonu o nofoaga o e nofo ai

Pe a tupu se faalavelave faafuasei

O le a saunia e nofoaga uma se fuafuaga patino mo faalavelave faafuasei ma e tatau ona e usitaia i le taimi e tupu ai

se faalavelave faafuasei. Faamolemole faamasani i le fuafuaga lenei ma faatino tulaga ua talosagaina ai oe e le aufaigaluega e fai.

O se solitulafono lou faia ma le mautinoa o se gaioiga e tupu ai se faailo sese, ma o lou faia o lea tulaga e ono molia ai oe i le faamasinoga. Tausi le mamao e 2 mita mai isi ma fai ufi fofoga ua tuuina atu ia te oe.

Tausiga tau soifua maloloina

E avanoa i taimi uma le aufaigaluega a le soifua maloloina i le nofoaga o loo e nofo ai. Faafesootai le talitelefoni a le faletalimalo ma talosaga i ai mo se tausimai e fesoasoani i ni atugaluga tau soifua maloloina. O le a mafai foi e le aufaigaluega a le soifua maloloina ona fesoasoani i nisi o mea o moomia mo fualaau ma talavai.

Taumafataga

O le a saunia au taumafataga o le taeao, aoauli ma le afiafi. O nisi meaai faaopoopo e totogi lava e oe.

Faailoa i le aufaigaluega i le nofoaga o loo e iai pe afai e iai ni meaai e te afaina ai, poo ni faaletonu tau soifua maloloina e moomia ai meaai faapitoa, e pei o le faama‘i Crohn.

E ono maua nisi auala i luga o le initaneti e oka ma momoli atu ai se taumafataga.

Talanoa i le aufaigaluega i le nofoaga o loo e nofo ai i auala e mafai ai ona momoli atu sau taumafataga sa oka.

Telefoni I le potu ma le wi-fi

E vili fua telefoni i totonu lava o le nofoaga, i le va o potu ma auaunaga o moomia i totonu o le faletalimalo.

E totogi telefoni i fafo atu o le nofoaga i le fua ua faatulaga ai mo faletalimalo (i le minute). Talanoa i le aufaigaluega a le faletalimalo e faaola le auaunaga mo oe.

E faaaogā fua le Wi-Fi. Talanoa i le aufaigaluega a le faletalimalo mo faamatalaga o moomia. Matou te fautuaina le faaaogā o apps e fesootai ai e pei o le FaceTime, Messenger ma le WhatsApp pe afai e te lē manao e totogi le faaaogāina o le telefoni.

Telefoni vili fua mo māori pharmacists.

Ngā Kaitiaki o Te Puna Rongoā o Aotearoa – e iai le telefoni vili fua mo le asosi a Māori Pharmacists Association (MPA) e tali ai fesili e fia malamalama ai kaumātua poo le aiga ia latou fualaau.

Vili le 0800 664 688 ma faailoa i ai faamatalaga e faafesootai atu ai oe. O le a toe faafesootai atu oe e se foma‘i Māori e faia talavai i totonu o le 24 itula.

Talanoa i le aufaigaluega o loo i le nofoaga o loo e nofo ai pe afai ua e moomia vave se fautuaga tau soifua maloloina.

Tagamea

O loo maua auaunaga mo tagamea i le taimi atoa o e nofo ai. Talanoa i le aufaigaluega a le faletalimalo poo le aufaigaluega i le nofoaga o loo e nofo ai i auaunaga e maua mai le nofoaga o loo e nofo ai.

Afai o e moomia poo se tasi o lou aiga o moomia se fesoasoani, faamolemole talanoa i le aufaigaluega o loo iai i le nofoaga o loo e nofo ai pe vili le talitelefoni a le faletalimalo.

Tausisia o le saogalemu ma le soifua maloloina lelei

O lou nofo ai i nofoaga o loo puleaina ai le faanofoesea, o lona uiga o loo e auai i galuega o loo faatino e tetee atu ai i le COVID-19, taofia ai le pepesi ma faasaoina soifua.

A o faanofoesea oe, e tāua lou mulimulitai i nisi o tulafono autu e maua ai lou saogalemu ma le soifua maloloina lelei. E faataga lou fealuai i fafo atu o lou potu e tusa ai ma tulafono o loo pulea ai. Faamolemole utagia ma mulimulitai i tulafono, taiala ma faatonuga ua tuuina atu e le aufaigaluega i le nofoaga o loo e nofo ai.

  • Fufulu ou lima i le fasimoli ma le vai i taimi uma (mo le umi e lē itiiti ifo ma le 20 sekone) ma solo mago lelei pe fufulu i se sanitiser i taimi uma.
  • Tale pe mafatua i lou tulilima, pe pupuni lou fofoga ma lou isu i solo pepa. Tia‘i vave loa solo pepa i se lapisi.
  • Taumafai e aua le lotea ou foliga, e aofia ai ou mata, isu ma le gutu pe afai e lē o mamā ou lima. E ono pipii i fola fāua ua aafia i le faama‘i.
  • Aua e te ulufale i le potu o le faletalimalo a se isi tagata tou te lē o 'nonofo faatasi'.
    • Fesootai tau lava ma tagata o loo tou 'nonofo faatasi.'
  • Tausi i le mamao e 2 mita mai isi se‘i vaganā tagata o loo tou ‘nonofo faatasi‘ (lou aiga/toalua).
    • E pepesi le COVID-19 i fāua, ma o lou tausisia o le mamao mai isi ma le tumamā lelei, e puipuia ai oe ma isi mai le pepesi o le COVID-19.
  • Fai lau ufi fofoga ua tuuina atu ia te oe i taimi uma pe a e fealuai i fafo atu o lou potu, poo taimi e ulufale atu ai se tasi i lou potu mo galuega e fia faaleleia pe faamamā le potu.
    • Mo nisi faamatalaga i le faiga e fai ai ufi fofoga, o loo maua i le itulau 27 ma le 28 o le faamaumauga lenei.
  • Fai au faamalositino i totonu o lou potu pe a mafai.
    • E vaavaaia e le aufaigaluega o loo i le nofoaga o loo e nofo ai, savalivaliga poo faamalositino e lē soona gaioi tele ai.
    • Afai ua e ma‘i e tatau ona faafesootai le aufaigaluega o loo i le nofoaga o loo e nofo ai e faatalanoa isi auala e fai ai au faamalositino.
    • Afai o loo fai i fafo au faamalositino, faamolemole manatua e tausi le mamao e 2 mita mai isi ma fai le ufi fofoga ua tuuina atu ia te oe.
  • E mafai ona ii faailo asu i le pefu, ausa, asu ma isi asu oona ma ausa.
    • Aua e te ulaula pe faapupusa i totonu o lou potu poo le fale atoa i soo se taimi lava.
    • Aua e te kukaina se meaai i totonu o lou potu.
    • Aua e te soona palaka le tele o mea i palaka.
    • Aua e te faatautauina solo taele poo mea e mu gofie i luga o heaters e faamamago ai.
    • Afai ua ii le faailo o se mu, mulimulitai i le faiga ua faasino atu e tuua ai le nofoaga ma faalogo i faatonuga ua tuuina atu e le aufaigaluega ma le puleaga a le faletalimalo.

Faaaogā tulaga ua faatapulaaina

O le nofo i nofoaga o loo puleaina ai le faanofoesea o se faiga tāua e tausisia ai le saogalemu i Niu Sila ma puipuia ai le pepesi tele o le COVID-19. O loo iai nisi o tulafono ma taiala i mea e lē faatagaina ona e faia a o e nofo ai i nofoaga nei.

Nofo I totonu o lou potu

E fautuaina lou nofo i totonu o lou potu se‘i vaganā ua moomia ona e alu i fafo. O se faiga e tausi ai lou saogalemu mai le aafia o oe ma taofia ai le pepesi o le COVID-19.

Afai e moomia ona e alu i fafo, manatua e fai lau ufi fofoga na tuuina atu ia te oe. E lē faataga ona faaaogā ufi fofoga e mafai ona toe faaaogā ma isi ufi fofoga pe a e iai i totonu o se nofoaga o loo faanofoesea pe vaavaaia ai.

E faasā tagata asiasi ona ulu- fale atu I totonu o nofoaga nei

E lē mafai e aiga poo uo ona asiasi atu ia te oe ina ia taofia ai le pepesi o le COVID-19.

E faaaogā fua le Wi-Fi i faletalimalo. Fesootai pea ma ou aiga ma uo e auala atu i isi auala tau fesootaiga e pei o le telefoni i ai pe a faaaogā apps e pei o le Zoom, SKYPE, ma isi.

E faasā ona pu‘e ata ma video

E faasā ona e pueina ni ata poo leo i vaega o lenei nofoaga e lē soona solia e nisi.

E aofia ai potu o loo faia ai siaki a tausimai ma galuega tau soifua maloloina, faapea nofoaga mo galuega tau puipuiga.

Afai e moomia ona ulufale se tasi o le aufaigaluega i lou potu, faamolemole ia e malamalama lelei i tulaga e lē soona faalauaiteleina ai tagata ma tapē soo se mea o loo pu‘e ai gaioiga ma leo ma aua e te pueina ni ata.

Faatauga I le supamaketi ma luga I le initaneti

E lē mafai ona e tuua le nofoaga, ae e mafai ona oka lau faatau i luga o le initaneti ma momoli atu lau faatau i le nofoaga o loo e nofo ai. O loo tele supamaketi e mafai ona fai ai lau faatau i luga o le initaneti, poo isi faleoloa o lata ane e mafai ona e maua.

Matou te malamalama lelei i tulaga e ono fia asiasi atu ai au uo poo aiga e momoli atu ni mea mo oe a o e nofo ai i le nofoaga lenei.

Talanoa i le talitelefoni a le faletalimalo poo le aufaigaluega o loo i le nofoaga o loo e nofo ai i le faagasologa o faiga e faataga ai ona momoli atu oloa o loo e moomia.

Fesootaiga ma faasalalauga

E maualuga le fia iloa e le mamalu o le atunuu i mea o tutupu i nofoaga o loo puleaina ai le faanofoesea ma vaavaaia ai tagata. E ono faafesootai atu oe e se tasi o ofisa faasalalau ma e pule lava oe pe e te manao e te talanoa i ai.

Faamolemole manatua e lē mafai ona ulufale tusitala i totonu o faletalimalo.

Afai ua e malie e fai se faatalatalanoaga, e mafai ona e faafesootai i le telefoni poo talanoa i video.

Manatua: O lo tatou galuega fai faatasi ma o loo matou faia mea uma e maua ai lou nofo lelei i totonu o nofoaga nei.

O loo iai auala e mafai ona e faailoa mai ai ia i matou ni faaletonu poo atugaluga o feagai ma oe i le taimi atoa o e nofo ai. Talanoa muamua i le aufaigaluega o loo i le nofoaga o loo e nofo ai. O la latou matafaioi o le fesoasoani ia te oe.

E mafai foi ona e lipotia soo se tasi e te talitonu ua solia tulafono, poo faia tulaga e ono pepesi ai le COVID-19. Tagai i le:

www.covid19.govt.nz/compliance(external link)

Tausi lelei i le soifua maloloina o lou mafaufau ma le soifua manuia.

E lē faigofie tulaga o loo feagai mai i tatou i taimi nei.

Afai o iai ni ou atugaluga poo nisi o loo tou iai faatasi i tulaga o loo e faalogoina poo lou soifua manuia, o loo iai faamatalaga ma auala e fesoasoani e maua ai le toafilemu i lou mafaufau ma le nofo lelei i le taimi o faanofoesea ai oe.

E tāua lou talanoa i se fomai, pe afai ua e lē gafatia se mea. O le tagata e muamua lava ona e faafesootaia o lau tausimai poo le aufaigaluega a le soifua maloloina o loo galulue i le nofoaga o loo e nofo ai.

1737

Vili pe text le 1737 mo se fesoasoani pe a maua i faalogona faanoanoa, atuatuvale, mafatia poo le soifua manuia o le mafaufau. E maua fua auaunaga nei, ma e mafai ona e vili i soo se taimi o le 24 itula, i aso e 7 o le vaiaso.

Getting through Together

O le Tauave Faatasi le Avega o loo maua ai fautuaga aogā mo lou tausia lelei o oe lava ma lou aiga i lenei vaitaimi o pepesi ai le COVID-19.

www.allright.org.nz(external link)

Sparklers

O le Sparklers at Home o se auala e maua i luga  o le initaneti mo matua, e tele ai meafai mananaia e fesoasoani i tulaga tau soifua manuia o tamaiti aoga i aoga tulagalua.

www.sparklers.org.nz(external link)

Mentemia

O le Mentemia o se app e mataituina, puleaina ma faaleleia ai le soifua manuia o lou mafaufau e ala i le faataatitia o sini mo aso taitasi ma iloa ai tulaga ua e oo i ai:

www.mentemia.com(external link)

Melon

O le Melon e maua mai ai puna‘oa ma metotia e malamalama ai le tagata ia te ia lava i faiga e pulea ai le soifua manuia o faalogona. Latou te fesoasoani foi i tupulaga talavou, e auala atu i video, fautuaga, pepa e faamatala ai se meafai, ata e mafai ona faasoa i luga o social media ma mataupu laiti e pulea ai le atuatuvale.

www.melonhealth.com(external link)

Just a thought

O le Staying on Track o se mataupu e fai i luga o le initaneti e aoao atu ai tomai ma faiga e pulea ai le popole, mea o mamafa i le mafaufau ma tausia ai lou soifua manuia faapea ma lou aiga.

www.justathought.co.nz/covid19(external link)

E tele nisi faamatalaga ma puna‘oa o loo maua i le upega tafailagi a le Matagaluega o Soifua Maloloina e fesoasoani i le soifua manuia o lou mafaufau, faapea ma faamatalaga e uiga i faalapotopotoga e maua atu ai le fesoasoani pe afai o e moomia nisi fesoasoani faaopoopo.

www.health.govt.nz/covid-19-mental-wellbeing(external link)

Fesoasoani e maua ai le saogalemu mai sauaga

E lē māmā i Niu Sila sauaga i totonu o aiga ma sauaga i feusuaiga matagā. E lē tatau ona lagona e se tasi le fefe pe lamatia ona o isi. O loo maua le fesoasoani mo tagata matutua ma tamaiti uma.

New Zealand Police

Vili le 111

Afai ua vave ona lamatia lou soifua vili Leoleo i le 111. Afai e lē mafai ona e talanoa mai, faalogo mo le option e vili ai le 55 – o le numera lea o le a faafesootai sa‘o ai oe i Leoleo.

Family violence it's not OK

Telefoni mo sauaga i totonu o aiga

E maua i le telefoni 0800 456 450 mo sauaga i totonu o aiga faamatalaga e maua i aso e fitu o le vaiaso, mai le 9am i le 11pm.

Safe to talk

Saogalemu ona e talanoa

E mafai ona maua i le telefoni ma le initaneti le numera o le telefoni autu mo sauaga matagā.

Vili le 0800 044 334

Fesoasoani mo le soifua lelei o tagata

O loo maua le fesoasoani pe a moomia faamatalaga poo auaunaga e maua ai fesoasoani, e aofia ai le faia o se talosaga mo fesoasoani tau tupe (ma isi fesoasoani o e moomia).

E tele auala ma faiga e mafai ona fesoasoani atu ai le Ministry of Social Development. E mafai foi ona e talosaga i le aufaigaluega i le nofoaga o loo e nofo ai pe mafai ona latou faatulaga se talosaga mo oe. E lelei lou mafaufau i auala e fetaui ma oe i le uluai taimi o lou nofo ai ina ia mafai ona e maua le fesoasoani o e moomia i le taimi e te tuua ai le nofoaga.

Work and Income

Galuega

Afai o moomia sau galuega pe a e tuua le nofoaga, o loo iai metotia e maua i luga o le initaneti e fesootai ai pule o galuega ma tagata o loo tau saili galuega.

O loo maua le fesoasoani e fai ai lau talosaga pe talanoa ai i le pule o le galuega, pe a maua se galuega e te fiafia ai. O loo maua foi fesoasoani i aoaoga e aoao ai le tomai ma maua ai tomai mo galuega, tapena ai lau CV, tusi talosaga pe faatumu ai lau talosaga mo se galuega.

Mo nisi faamatalaga, tagai i le:

www.jobs.govt.nz(external link) poo le www.workandincome.govt.nz/work(external link)

Fale

E tatau i tagata uma ona maua nofoaga e saogalemu ma maloloina lelei e nonofo ai.

Afai ua leai se fale e te faamautu i ai pe a tuua le nofoaga o loo faanofoesea ai e ono maua le fesoasoani e saili ai se

fale e te nofo ai. Faafesootai le Ministry of Social Development riqc@msd.govt.nz

Mo nisi faamatalaga faamolemole tagai i le: www.workandincome.govt.nz(external link)

Ministry of Social Development

Tupe

Afai e leai sau galuega pe ua lē mafai ona e faigaluega i se taimi vave i le lumanai, e ono mafai ona maua sau penefiti poo se fesoasoani tau tupe.

Mo nisi faamatalaga i fesoasoani tau tupe e te ono agavaa ai, tagai i le check.msd.govt.nz(external link)

Tupe faaalu mo femalagaiga

E ono maua le fesoasoani pe a e moomia le faatupega o femalagaiga e te alu ai i le fale. E te maua fesoasoani nei tusa lava pe afai e te lē o maua se penefiti. Imeli mai i le riqc@msd.govt.nz

Tagata i lalo ifo o le 18 tausaga le matutua

Afai e lei atoa le 18 o ou tausaga, e mafai ona matou fesoasoani atu ia te oe ma lou aiga/matua/tagata o loo tausia oe ina ia maua lou nofo lelei ma le saogalemu. E ono iai tulaga faapitoa e mafai ona maua, mo se faataitaiga faiga e mafai ai ona faatino meaaoga.

E mafai ona e maua le Home Learning TV i le tvnz.co.nz on-demand(external link). E silia ma le 300 ata faasolo e faatatau i lesona mo tamaiti aoga amata ma tamaiti aoga uma. E tele foi puna‘oa mo aoaoga ma le soifua manuia e maua i le learningfromhome.govt.nz e fesoasoani ia te oe ma lou aiga a o faanofoesea ai.

E mafai foi ona e talosaga tou te faanofoesea faatasi ma se tasi o ou matua poo se tasi o loo tausia oe, i le nofoaga o loo puleaina ai le faanofoesea, e tusa ai ma tulaga ua tuusaunoaina. Faamatalaga e uiga i tulaga e tuusaunoaina o loo maua i le itulau 20 o faamatalaga nei.

Tau faaee atu i nofoaga o loo puleaina ai le faanofoesea

E toe faaola e le Malo nisi o tupe faaalu i nofoaga o loo puleaina ai le faanofoesea, ina ia faamāmā ai tupe faaalu i se faiga e atagia lelei ai le aogā i le mamalu o le atunuu, faapea ma tagata e ulufafo ma ulufale mai i totonu o le atunuu.

Na amata ona totogi le faanofoesea mai le 12.01am aso 11 Aokuso 2020.

E fia le tau o le faanofoesea?

E $3,100 mo le tagata muamua poo le tagata na o ia lava o loo iai i le potu (tusa lava poo se tagata matua poo se tamaitiiti) ma le $950 mo le tagata matua e toatasi e faaopoopo ai ma le $475 mo le tamaitiiti e toatasi e faaopoopo ai (tamaiti uma mai le 3-17 tausaga le matutua) o loo nonofo faatasi i le potu, o loo aofia ai le GST i tupe nei.

E leai se tau faaee atu mo tamaiti e lei atoa le 3 tausaga le matutua, pe afai o loo nonofo i le potu faatasi ma se isi tagata.

Afai e tatau ona e totogia le faanofoesea o oe, o le a e totogia i le potu e tasi. Faamolemole tagai i le www.miq.govt.nz/charges mo nisi faamatalaga.

O ai e tatau ona totogiina le faanofoesea?

  • O tagatanuu Niu Sila o loo asiasi mai i Niu Sila mo le umi e lē atoa se 90 aso, se‘i vaganā ai e agavaa mo le faataatia ese pe tuusaunoaina. O tagatanuu Niu Sila o loo faamatala o tagata sitiseni Niu Sila (e aofia ai i latou mai le Atu Kuki, Niue ma Toelau) ma i latou o loo umia visa nofomau, ma sitiseni Ausetalia ma tagata nofomau Ausetalia e masani ona aumau i totonu o Niu Sila.
  • O tagatanuu Niu Sila e pei ona faamatalaina atu, o i latou na tuua Niu Sila i le taimi o le 12.01am aso 11 Aokuso 2020 poo le te‘a ai o le taimi lea.
  • O tagata o umia visa mo se vaitaimi lē tumau, se‘i vaganā e masani ona aumau i totonu o Niu Sila talu mai le aso 19 Mati 2020 ma na tuua Niu Sila i le aso 19 Mati 2020 poo luma mai o le aso lea.
  • O le a totogi e tagata uma o loo ulufale mai ona o tulaga faatagaina e pei o tagata faigaluega mo galuega moomia poo se tagata faigaluega o le soifua maloloina. Afai e te lē o mautinoa poo ai e totogiina tupe faaee atu, faamolemole faafesootai le pule o lau galuega.

Afai e tatau ona e totogia le faanofoesea, e moomia le faatumu o le pepa i luga o le initaneti Fee and Waiver Form i le www.miq.govt.nz/charges. A mae‘a ona faatumu, faamolemole imeli le pepa i le fees@miq.govt.nz

O ā tulaga e tuusaunoaina ma faataatia ese?

O tulaga e tuusaunoaina e faatatau i tagata e lē moomia ona latou totogiina le faanofoesea i nofoaga o loo puleaina ma vaavaaia ai.

O le faataatia ese e faatatau i tagata e ono totogiina lo latou faanofoesea i nofoaga o loo puleaina ai, peitai e mafai ona talosaga e aveese se vaega poo le vaega atoa o tau faaee atu.

O ai e tuusaunoaina mai tau faaee atu?

  • O tagatanuu Niu Sila o le a nonofo i totonu o Niu Sila mo le umi e sili atu ma le 90 aso, pe a faapea e lei tuua Niu Sila i le aso 12.01am aso 11 Aokuso 2020, poo le te’a ai o le taimi ma le aso lea.
  • O tai toalua, fanau ma ē o loo tausia tamaiti o loo faanofoesea poo malaga faatasi ma se tasi ua tuusaunoa mai le totogiina o tau faaee atu (se‘i vaganā pe afai o loo ulufale mai i le atunuu i lalo o le igoa o se tagata faigaluega tāua o loo tuusaunoaina).
  • Soo se tasi i totonu o Niu Sila ua faanofoesea i nofoaga o loo puleaina ai ina ia mafai ona ia tausia se tasi ua tuusaunoa mai tau faaee atu.
  • O tagata sulufai, e aofia ai tagata e ona talosaga, tagata o loo puipuia ma tagata sa talosaga mai i lalo o le faatulagana faapitoa tau femalagaiga mo ē ua aafia i sauaga i totonu o aiga, pe afai o le taimi muamua lea ua ulufale mai ai i totonu o Niu Sila.
  • Soo se tasi ua ulufale mai i Niu Sila i se vaalele faapitoa mo togafitiga faafoma‘i poo se tasi na laveaia mai le ogasami.
  • O gasegase o loo malaga mai o se vaega o le Ministry of Health‘s High Cost Treatment Pool poo le Ministry of Foreign Affairs and Trade‘s New Zealand Medical Treatment Scheme.
  • Tagatanuu Niu Sila e masani ona aumau i le Atu Kuki, Niue poo Toelau o loo malaga mai i Niu Sila mo le sailia o togafitiga faafoma‘i.
  • Tagatanuu Niu Sila e nonofo i le Atu Kuki, Niue poo Toelau, o loo malaga mai se atunuu e lē lelei le tamaoaiga ma o loo faaauau le faigamalaga i Niu Sila (ma nonofo ai i le atunuu mo le umi e lē silia le 90 aso) e toe foi ai i le Atu Kuki, Niue poo Toelau (nonofo ai iinei mo le umi e lē itiiti ifo ma le 90 aso).
  • Tagata ua aveese faamalosi mai isi atunuu ma toe faafoi mai i Niu Sila ona o solitulafono, ua ta‘ua o ‘returning offenders‘‘ i lalo o le Returning Offenders (Management and Information) Act 2015 ma soo se sitiseni Niu Sila ua aveese faamalosi mai Ausetalia.
  • Sui o le malo ma konesula, e aofia ai o latou aiga, ma sui aloaia o ofisa faavaomalo.

Afai e te iloa e tuusaunoaina lou totogiina o se tau faaee atu, faamolemole faatumu le Fee and Waiver Form i le www.miq.govt.nz/charges e faamatala ai mafuaaga e tatau ai ona tuusaunoa oe. A mae‘a ona faatumu le pepa lea faamolemole lafo mai i le imeli fees@miq.govt.nz.

O ai e mafai ona talosaga mo tupe e toe faataatia ese?

E mafai e soo se tasi o loo nofo i nofoaga o loo puleaina ai le faanofoesea ona talosaga mo le faataatia ese o ni tupe e totogi. O le a iloiloina talosaga taitasi i tulaga o loo talosagaina ai.

E mafai ona faataatia ese ni tupe e totogi i tulaga ua matuai pagatia ai tulaga tau tupe ma isi tulaga faapitoa e aofia ai:

  • Se tagatanuu Niu Sila ua ulufale i se nofoaga o loo puleaina ai le faanofoesea talu ai na ia tuua Niu Sila e toe malaga faatasi mai i le atunuu ma se isi e iai ni manaoga faapitoa pe lē mafai ona malaga toatasi na o ia.
  • O se tagata o moomia ona ulufale mai pe tuua Niu Sila mo togafitiga faafoma‘i.
  • O isi mafuaaga sii alofa, e aofia ai pe a malaga se tasi e asi se isi ua matuā tigaina lona gasegase poo se tasi o le aiga ua pulapula lagoto le soifua poo le auai i se maliu (se maliu i Niu SIla poo atunuu mamao).

Mo nisi faamatalaga e iloa ai tagata e mafai ona talosaga mo le faataatia ese o tau faaee atu, atoa ma faamaumauga e tatau ona aofia i le talosaga, faamolemole tagai i le www.miq.govt.nz/charges.

Auala e talosaga ai mo le faataatia ese o tau faaee atu

Afai o e talosagaina le faataatia ese o tau faaee atu, e moomia ona faatumu le pepa Fee and Waiver Form mai le www.miq.govt.nz/charges. A mae‘a ona faatumu le pepa lea faamolemole lafo mai i le imeli fees@miq.govt.nz. Faamolemole ia mautinoa ua faapipii faatasi ma lau pepa talosaga ni faamaumauga talafeagai e lagolagoina ai lau talosaga.

Totogiina o tau faaee atu

O tagata e tatau ona totogia tau faaee atu mo le faanoefesea i le nofoaga o loo puleaina ai, o le a tuuina atu i ai se lisiti pe a tuua le nofoaga sa faanofoesea ai ma e masani lava ona avatu le 90 aso e totogi ai. O le a faamatala atu i le lisiti le auala e totogi ai. E lē moomia ona totogi e tagata tupe i le nofoaga sa faanofoesea ai.

Mo nisi tulaga o fia malamalama ai e uiga i tau faaee atu mo nofoaga o loo puleaina le faanofoesea

Faamolemole tagai i le www.miq.govt.nz/charges

Tuua o se nofoaga sa faanofoesea ai pe a tuanai aso e 14

E moomia ona e nofo i le nofoaga o loo puleaina ai le faanofoesea mo le umi e lē itiiti ifo ma le 14 aso.

Sauni se fuafuaga tau femalagaiga

E tāua lou malamalama lelei i le nofoaga o le a e agai i ai pe a mae‘a le taimi sa e nofo ai i le nofoaga o loo pulea ai le faanofoesea. O le a fesili atu le aufaigaluega o loo iai i le nofoaga i au fuafuaga mo au feoaiga a o lei tuua le nofoaga.

  • Ia manino ona e faailoa atu le nofoaga o le a e agai i ai ma le auala e te malaga ese ai
    • O se faiga matou te iloa ai le taimi e te tuua ai le nofoaga, ma faatulaga lelei le taimi o le a e alu ese ai ma ia gasolo lelei lou tuua ai o le nofoaga.
  • O loo maua le auala e te malaga ai i le malaevaalele
    • Matou te momolia oe i le malaevaalele na e taunuu mai ai, pe afai e te finagalo ai, se‘i vaganā o iai nisi au fuafuaga.
  • E moomia ona faatonu lava e oe le auala e te malaga ese ai mai le nofoaga lenei i le isi apitaga.
    • Afai e lē mafai ona e faafesootaia sau auala, faamolemole faafesootai le aufaigaluega o loo iai i le nofoaga mo se fautuaga.
  • Talanoa mai pe afai e te lē o mautinoa poo fea e te faamautu i ai
    • Afai e lē o iai se nofoaga e te faamautu lelei i ai, faamolemole talanoa i le aufaigaluega o loo iai i le nofoaga, e ono mafai ona latou fesoasoani atu pe mafai foi ona latou tuuina atu lau mataupu i matagaluega a le Malo mo se fesoasoani.

Faamolemole faailoa i taimi uma i le aufaigaluega o loo iai i le nofoaga pe afai ua sui le apitaga e te faamautu i ai poo au fuafuaga mo au feoaiga i soo se taimi a o e faanofoesea ai. Tagai i le Pepa Faapipii 2 mo nisi faamatalaga.

Tuua le nofoaga

O le toatele lava o tagata e moomia le iai o se faamaoniga e lē o aafia i le COVID-19, ma se faamaoniga mai se fomai e maualalo tulaga e te ono aafia pe pepesi ai le COVID-19 mai ia te oe, faatoa mafai lea ona e tuua le nofoaga.

E ono faamalosia lou nofo ai mo le umi e 28 aso pe afai e te musu e fai sau siaki i le COVID-19, poo le leai o se manatu i le fomai e maualalo tulaga e ono lamatia ai oe i le faama‘i.

O le maualalo o tulaga e te ono aafia pe pepesi ai le COVID-19 e aofia ai se faamaoniga:

  • Sa e nofo i se nofoaga o loo puleaina ai le faanofoesea mo le umi e lē itiiti ifo ma le 14 aso
  • E lē o iai ni āuga e foliga tutusa i le COVID-19, e aofia ai le tiga o le faaī, tale pe faafaigata ona mānava/tau lē lava le mānava
  • E lē o vevela lou tino i le maualuga e 38°C pe sili atu
  • O le tele o taimi na siaki ai oe, na faamaonia lava e te lē o aafia i le COVID-19

E tatau ona e faamalieina tulaga nei ona mafai lea ona e tuua le nofoaga, ma ua tuuina atu se tusi e faamaonia ai ua mae‘a ona e nofoia le umi sa tatau ai ona e faanofoesea i nofoaga nei. E moomia foi le faatumu o le Pepa Faatumu pe a Tuua le Nofoaga o loo Puleaina ai le Faanofoesea. E maua le fesoasoani mai le tausimai e faatumu ma saini ai le pepa.

O le a e malaga i le nofoaga e pei ona e ta‘ua i lau fuafuaga tau femalagaiga.

Faamolemole vaavaai ma faalogologo pea i tulaga ua iai vaega o lapataiga o le COVID-19 i Niu Sila ma usitaia soo se tulafono i le faamamao ese mai isi tagata, tumamā o lima ma le faaaogāina o PPE, i le taimi e te tuua ai le nofoaga.

E maua nisi faamatalaga e uiga i vaega o lapataiga i le:

www.covid19.govt.nz/alert-system(external link)

Faalogoina le ma‘i i le taimi na e tuua ai le nofoaga

Afai o iai ni au fesili o fia tuliloaina poo fesili e uiga i lou soifua maloloina pe ua amata ona alia‘e āuga o le COVID-19, faamolemole vili le Healthline i le 0800 358 5453 poo lau GP.

Mo soo se faalavelave faafuasei vili le 111.

Toe faamanatu

O āuga nei o le COVID-19:

  • Tale
  • Tiga le faaī
  • Tafe le isu
  • Lē lagona manogi o mea
  • Tau lē lava le mānava
  • Fiva

E tāua lou talanoa i se fomai, pe afai ua e lē gafatia se mea. Afai e te moomia nisi faamatalaga, tagai i le:

www.health.govt.nz/covid-19(external link).

Tulaga tuusaunoaina mai nofoaga o loo puleaina ai le faanofoesea

Ua faataatia e le Malo o Niu Sila se faiga faavae malosi e puipuia ai Niu Sila mai le COVID-19. O la matou galuega le taofia o le sao mai o le COVID i totonu o tatou afioaga, ma e lē tatau ona tatou faatagaina ni faiga e ono lamatia ai le soifua maloloina o tagata.

E itiiti lava ni mafuaaga e mafai ai ona faataga le tuua e se tasi o le nofoaga o loo puleaina ai le faanofoesea, ma ua faamaonia e maualalo tulaga e ono lamatia ai le mamalu o le atunuu ma e mafai ona pulea lelei. O tulaga masani, e moomia ona faamaonia e lē o aafia i le aso 3 ma le aso 12 e fai ai siaki o le COVID-19, ma faia se suesuega atoatoa i le soifua maoloina ina ia mafai ona iloilo se talosaga e tuusaunoa ai mai nofoaga o loo faanofoesea ai tagata. E ono faafaigata ona maua se faatagana pe afai na e tuua pe sa e malaga talu ai nei i se atunuu o loo sasao tele ai le pepesi o le COVID-19.

I le taimi nei, e fa ituaiga talosaga mo le tuusaunoaina o loo maua i luga o le initaneti: Transit Passenger; Medical Exemption; Joining Someone in Managed Isolation; ma le Exceptional Circumstances. E fuafua lava faaiuga i talosaga taitasi ma e maualuga le tulaga e tatau ona ausia mo le taliaina o se talosaga.

Mo nisi faamatalaga i le faagasologa o le tuusaunoaina ma talosaga mo se tuusaunoaga, faamolemole tagai i le: 

www.miq.govt.nz/exemptions

Afai ua tuusaunoaina lou tuua ai o se nofoaga o loo puleaina ai le faanofoesea, e moomia pea ona faamae‘a le faanofoesea o oe mo le umi e lē itiiti ifo ma le 14 aso mai le taimi na e taunuu ai i totonu o Niu Sila.

E lē mafai ona talosaga se tuusaunoaga pe afai ua amata ona alia‘e āuga o le COVID-19 i le taimi a o e iai i le nofoaga o loo puleaina ai le faanofoesea o oe ma ua aveese oe i se faletalimalo e vaavaaia ai.

Pepa Faapipii 1: Faamatalaga i siaki o le COVID-19

E tāua lou faitau pe ua faamatalaina atu ia te oe faamatalaga i siaki o le COVID-19 o loo ta‘ua i lalo. Talanoa i sui o le soifua maloloina i le nofoaga o loo e iai pe afai o iai ni ou atugaluga.

O le ā le mea e tupu pe a siaki a‘u i le COVID-19?

  • O le a talosagaina oe e faatumu se pepa pe tali fesili e aofia ai faamatalaga e faafesootai atu ai oe.
  • O le a salu mai sina vavale mai le pito i tua i totonu o lou isu; e lē manaia i le faalogo ae e te lē afaina ai. E lē atoa se minute e fai ai le siaki.
  • E tatau ona e faailoa i le tagata o loo faia lau siaki pe afai e te maua i se tulaga e ono afaina ai le malosi o le pa‘u o lou tino, ma afaina ai le fegasoloai o le toto, pe afai o e faaaogāina fualaau e taofia ai le potopotoi o le toto. Afai o e maua i nisi o tulaga nei, e ono faia e le aufaigaluega le faaiuga e taofia ai le faia o lau siaki talu ai e tāua le faamuamua o puipuiga o lou soifua maloloina.
  • E lua aso e ono faatali ai iuga o siaki sa fai.
  • E leai se tupe e totogi mo le faia o siaki.
  • O le a faaauau pea tulafono o le faanofoesea ai o oe a o faatali iuga o siaki sa fai.

O le ā le mea e tupu pe afai e lē o faamaonia ua ou aafia?

  • Afai ua faamaonia e te lē o aafia, o le a logo atu oe i se text poo le telefoni, poo se sui a le vaega tausimai o loo iai i le nofoaga o loo e iai.
  • E moomia ona e nofo ai pea i le nofoaga o loo puleaina ai le faanofoesea, pe afai o se siaki na fai i le aso 3.
  • Afai o se siaki na faia i le aso 12, o le a toe suesue tulaga e faamaonia ai e maualalo tulaga e te ono aafia ai pe pepesi atu ai le COVID-19 i isi, ma ua mafai ona e tuua le nofoaga pe a mae‘a lelei le 14 aso.
  • Afai ua faamaonia e te lē o aafia, o lona uiga e lei mafai ona iloa le COVID-19 i le taimi na fai ai lau siaki. E ono mafai lava ona alia‘e i se taimi mulimuli ane a o faanofoesa oe, ma e tāua ai lou tausisia pea o le tumamā ma tulaga e faanofoesea ai i le taimi atoa i le nofoaga o loo puleaina ai le faanofoesea.

O le ā le mea e tupu pe afai ua faamaonia ua ou aafia?

  • Afai ua faamaonia ua e aafia, o le a asiasi atu se tasi e faailoa tino atu ia te oe lea tulaga.
  • E ono siitia oe i se isi nofoaga ma e moomia ona vaavaaia oe. O le a siitia foi ma isi tagata poo lou aiga sa tou fesootai i le taimi sa e nofo ai, mo le mataituina lelei o i latou.
  • O le a e nofo i le nofoaga e vaavaaia ai mo le umi e lē itiiti ifo ma le 10 aso talu mai le aso na alia‘e ai āuga o le COVID-19, pe talu mai le aso na fai ai lau siaki (poo fea lava e sili ona umi atu) ma e tatau ona silia ma le 72 itula talu ona lē toe maua oe i āuga o le COVID-19, ae e te lei tuua le nofoaga.
  • O le umi atoa e faanofoesea ai oe i nofoaga nei o le a tumau pea i le 14 aso.
  • E tāua lou faailoa o tulaga e uiga i se tasi e ono avea ma au fesootaiga vavalalata i le aufaigaluega o loo iai i le nofoaga . O le a fesili atu foi le aufaigaluega poo ai na e fesootai i ai talu ai nei. O i latou na e ono talosagaina le faanonofo i nofoaga e vaavaaia ai i ne‘i te‘i ua mama‘i foi ma i latou. O tagata sa e fesootai i ai e ono moomia ona faanofoesea i nofoaga e vaavaaia ai mo aso e 14 mai le aso mulimuli sa outou feiloai ai.

Faapefea pe afai ua amata ona ou ma‘i i le taimi ua ou nofo ai i le nofoaga o loo puleaina le faanofoesea ai?

Afai ua amata ona alia‘e ni āuga o le COVID-19 (tale, tiga le faaī, tau lē lava le mānava, tafe le isu, lē lagona le manogi o mea, pe fiva) i le taimi o e faanofoesea ai poo se isi faama‘i, e tatau ona e faailoa tulaga nei i le aufaigaluega a le soifua maloloina o loo iai i le nofoaga. Faamolemole vili mai i le telefoni i lou potu e faailoa mai ai tulaga nei. O le a latou suesueina tulaga ua feagai ma oe ma faatalanoa gaioiga talafeagai e tatau ona e faia.

O le ā le mea e tupu i faamatalaga ua aoina e uiga ia te a‘u?

Faatoa faasoa lava faamatalaga e patino ia te oe ma iuga o au siaki sa fai, i faalapotopotoga a le malo o loo feagai tonu ma le puleaina o le COVID-19. Faatoa mafai lava ona matou faaaogāina ma faailoa faamatalaga e patino ia te oe pe afai o loo faatagaina i tulafono mo tulaga e lē faalauaiteleina.

I le taimi o loo faatino ai galuega e tali ai i le COVID-19, o le a faaaogā faamatalaga e faalapotopotoga tau soifua maloloina mo le puleaina o le faama‘i COVID-19 ma e ono faasalalauina faalauaitele faamaumauga tusitusia e lē mafai ona iloa ai tagata ua aafia. E iai lau aiatatau e sailia ma faasa‘o ai faamatalaga o loo umia e uiga ia te oe.

O fea ou te maua ai nisi fautuaga?

Mo fautuaga tau soifua maloloina faafesootai le aufaigaluega a le soifua maloloina o loo iai i le nofoaga o loo e nofo ai. E mafai foi ona e vili le Healthline i le telefoni vili fua 0800 358 5453. Manatua, E LĒ MAFAI ona iloa e le Healthline iuga o au siaki sa fai.

E maua faamatalaga masani e uiga i tulaga ua iai mo le COVID-19 i totonu o Niu Sila i le www.covid19.govt.nz(external link) poo le upega tafailagi a le Matagaluega o Soifua Maloloina www.health.govt.nz(external link).

Pepa Faapipii 2: Faatalatalanoaga mo se Fuafuaga Tau Femalagaiga

E moomia ona e nofo i le nofoaga e faanofoesea ai mo le umi e lē itiiti ifo ma le 14 aso.

O le a fesili atu i au fuafuaga tau femalagaiga i le taimi e te tuua ai le nofoaga pe a tuanai aso e 14 pe a faatalanoa se Fuafuaga Tau Femalagaiga. O le a faatautaia le faatalanoaga i le nofoaga i totonu o le aso lona 4 talu ona e taunuu, ma o le a faatulaga e le aufaigaluega o loo iai i le nofoaga le taimi ma le aso e fai ai.

E moomia ona faamaopoopo au fuafuaga mo le taimi e fai ai lau Faatalatalanoaga mo se Fuafuaga Tau Femalagaiga:

Pe o iai se tuatusi o le fale e te faamautu i ai pe a tuanai aso e 14 sa e faanofoesea ai:

  • Faatumu faamatalaga o le tuatusi o le fale.
  • Faamatalaga i le auala e te malaga ese ai mai le nofoaga agai i lou fale/tuatusi ua faailoa. Mo se faataitaiga, e te malaga ese i se faigamalaga i le vaalele i totonu o Niu Sila pe faatali se tasi o lou aiga e alu atu e momoli oe i lou fale.
  • Afai e lei mautu sou auala, faailoa i le aufaigaluega o loo i le nofoaga latou te iloa ai le fesoasoani e ono moomia e momoli ai oe i le fale poo le tuatusi ua faamauina.
  • Soo se tulaga patino o moomia mo faigamalaga i luga o auala tetele poo vaalele e tatau ona matou iloa.

Afai e lē o iai se fale poo le tuatusi o le fale e te faamautu i ai pe a tuanai aso e 14 sa e faanofoesea ai, e ono moomia lou faamatala o tulaga o feagai ma oe. E aogā lo matou iloa e mafai ai ona matou faafesootaia faalapotopotoga e maua mai ai le fesoasoani o e moomia e pei o tulaga tau fale poo mea e patino ia te oe.

Pepa Faapipii 3: Aiatatau faatulafonoina

O loo folasia i faamatalaga o loo ta‘ua i lalo au aiatatau a o e nofo ai i le nofoaga o loo puleaina le faanofoesea ai.

E tusa ai ma le tulafono, e tatau ona e nofo ai pea i le nofoaga lenei e pei ona poloaia i le COVID-19 Public Health Response (Air Border) Order 2020 (poo isi tulafono i luma mai). O se auala e puipuia ai tagatanuu Niu Sila mai le pepesi o le COVID-19.

E maua le kopi o le poloaiga ua faatulafonoina i le: www.pco.govt.nz/covid-19-legislation(external link)

E iai lau aiatatau e saili ma faatonu ai se loia e aunoa ma le faatuai, ma o se tulaga e totogi lava e oe. O loo iai lau faitalia e mafai ai ona e talanoa i lau loia i se nofoaga e lē faalauaiteleina.

E mafai ona e faafesootaia i le telefoni se loia ua e filifilia, ma e iai le faitalia e te faafesootai ai se loia ua e manao i ai. O loo maua le telefoni i totonu o lou potu e mafai ona e faaaogā e faafesootai ai se loia.

E mafai ona matou fesoasoani pe afai o iai ni faaletonu poo atugaluga

E matuai faatāua faaseā uma ua tuuina atu i le vaega a le Managed Isolation and Quarantine (MIQ). Matou te talitonu e iai le aiatatau o tagata uma e faaali ai se faaseā ma e tatau ona tausi le va fealoaloai o tagata uma o aafia, ma ia lava atoatoa le taimi ma le avanoa e faailoa ai o latou manatu.

Matou te mulimulitai i faiga e sa‘o, faigofie, vave ma aogā e soalaupule ai faaseā.

Matou te amanaia e lē tatau ona faalauaiteleina soo se suesuega ma ia faia ma le agaga moni ma le mamā.

O le a matou faaaogāina taunuuga e alia‘e mai faaseā o se avanoa e toe timata ai le upega ma toe faaleleia ai faagasologa o a matou galuega.

Auala e tuuina mai ai manatu

Afai o loo e nofo i le taimi nei i se nofoaga tau MIQ ma e lē o faamalieina oe i tulaga na e manatu i ai, e tatau ona e faafesootaia muamua le Facility Manager poo le Wellbeing Coordinator.

E toatele tagata e iai tomai faapitoa o loo iai i le nofoaga e mafai ona latou soalaupuleina le tele o faaletonu e aofia ai puipuiga, saogalemu, soifua maloloina ma le soifua manuia, ma fesoasoani o moomia e patino i le tagata. E tatau ona e faafesootaia muamua le aufaigaluega i totonu o nofoaga e tusa ai ma ou atugaluga.

Afai e lei maua se tonu lelei i se atugaluga na faaleo, e mafai ona e faailoa lau mataupu i le pepa e faatumu Complaints Form e maua i le upega tafailagi a le MIQ. E mafai foi ona maua i le: www.miq.govt.nz/about/contact-us

Faagasologa o faaseā

E mafai ona fai sau faaseā i auala nei:

  •  Talanoa i le Facility Manager poo le Wellbeing Coordinator o loo iai i le nofoaga o loo puleaina ai le faanofoesea ma le vaavaaia.
  • Faatumu le pepa e fai ai lau faaseā i le upega tafailagi a le MIQ - www.miq.govt.nz/about/contact-us

O le ā le isi laasaga o sosoo ai?

O le a imeli atu se faamatalaga e faailoa aloaia atu ai le tuuina mai o faaseā uma, i totonu o aso faigaluega e lua talu ona maua le faaseā.

O le a faamae‘a la matou suesuega i se taimi vave ma talafeagai i totonu o aso faigaluega e lima, talu mai le aso na tuuina atu ai ia te oe se faamatalaga e aloaia ai le tuuina mai o lau faaseā, se‘i vaganā pe afai ua foia lelei i totonu o le vaitaimi o faatalitali ai se iuga o se suesuega o fai. Afai e moomia ona toe faaopoopo le taimi e fai ai le suesuega, o le a faailoa atu le taimi fou e maua ai se iuga ma mafuaaga ua faia ai lea suiga.

O le a e maua se tusi mai le Resolutions Team e faailoa atu ai se faaiuga, faamatala manino ai faamaoniga sa iloiloina ma mafuaaga tatau, ma nisi o galuega na faatino talu ai se faaseā.

Afai o lau faaseā e faasaga i se isi faalapotopotoga o loo aofia i le MIQ, e ono tuuina atu lau faaseā i le faalapotopotoga e talafeagai ona latou iloiloina. E aofia ai faaseā e sili atu ona talafeagai pe a iloiloina e le New Zealand Defence Force, Matagaluega o Soifua Maloloina, District Health Board, NZ Police poo isi matagaluega a le malo poo paaga o loo aofia i le puleaina o nofoaga o loo faanofoesea ai tagata.

Pe afai e te lē o fiafia i le faaiuga ua fai faasaga i lau faaseā

O le a faailoa atu foi e le Resolutions Team pe afai e ono tatau ona tuuina atu lau mataupu i le Office of the Ombudsman poo le Office of the Privacy Commissioner (pe a talafeagai ai) pe afai e te lē o malie i le faagasologa na iloilo ai lau faaseā. E mafai ona e maua nisi faamatalaga i faagasologa latou te iloilo ai faaseā:

www.ombudsman.parliament.nz(external link)

www.privacy.org.nz/(external link)

Pepa Faapipii 4:Faiga e fai ma aveese lelei ai se ufi fofoga

Fai le ufi fofoga ua tuuina atu ia te oe i taimi uma pe a e fealuai i fafo atu o lou potu, poo taimi e ulufale atu ai se tasi i lou potu mo galuega e fia faaleleia pe faamamā le potu. E tatau ona faatasi lava ona e faaaogāina ufi fofoga nei - e tatau ona fai se ufi fofoga fou i taimi uma e te tuua ai lou potu. Afai ua uma ufi fofoga na o le faatasi e mafai ai ona faaaogā, faafesootai le aufaigaluega a le MIQF latou te tuuina atu nisi ufi fofoga se tele. Aua ne‘i faaaogāina faatasi ma isi tagata lau ufi fofoga. E lē faataga ona faaaogā ufi fofoga e mafai ona toe faaaogā ma isi ufi fofoga pe a e iai i totonu o se nofoaga o loo faanofoesea pe vaavaaia ai.

Faiga e fai ai le ufi fofoga:

  • Fufulu ou lima.
    • Fufulu ma solo mago ou lima pe faaaogā le sanitiser e fufulu ai lima, a o lei faia lau ufi fofoga.
  • Siaki lau ufi fofoga.
    • Mautinoa o loo mamā, mago ma e lē o masae.
  • Fai le ufi fofoga i ou foliga.
    • Faataatia le ufi fofoga i luga a‘e o lou isu, gutu ma le auvae, ma lave manoa i tua o ou taliga e faamau lelei ai.
  • Tai fa itula ma sui le ufi fofoga pe vave foi ona sui pe afai ua susū, masae pe ua palapalā.
    • Tia‘i ufi fofoga i se kalone lapisi.
  • Fufulu ou lima.
    • Fufulu ma solo mago ou lima pe faaaogā le sanitiser e fufulu ai lima

A fai lau ufi fofoga e lē tatau ona e:

  • Lotea le pito i luma o lau ufi fofoga.
  • Lotea ou foliga.
  • Fetosoai lau ufi fofoga.

O se taiala patino lava i le faaaogāina o ufi fofoga i totonu o Managed Isolation and Quarantine Facilities (MIQF). E tatau ona e faia na o ufi fofoga e faatasi ona faaaogā na tuuina atu e le MIQF. E tatau ona faatasi lava ona e faaaogāina ufi fofoga nei - e tatau ona fai se ufi fofoga fou i taimi uma e te tuua ai lou potu. Afai ua uma ufi fofoga na o le faatasi e mafai ai ona faaaogā, faafesootai le aufaigaluega MIQF latou te tuuina atu nisi ufi fofoga se tele.

Faiga e aveese ai se ufi fofoga:

  • Fufulu ou lima.
    • Fufulu ma solo mago ou lima pe faaaogā le sanitiser e fufulu ai lima, a o lei tatala ese lau ufi fofoga.
  • Aveese lau ufi fofoga.
    • Aveese manoa o loo lave i ou taliga e tatala ese ai ufi fofoga.
  • Tia‘i ufi fofoga i se kalone lapisi.
    • Aua le toe faaaogāina pe taumafai e toe faamamā ufi fofoga e na o le faatasi e mafai ai ona faaaogā.
  • Fufulu ou lima.
    • A uma ona aveese lau ufi fofoga, fufulu ma solo mago ou lima pe faaaogā le sanitiser e fufulu ai ou lima.

O se taiala patino lava i le faaaogāina o ufi fofoga i totonu o Managed Isolation and Quarantine Facilities (MIQF). E tatau ona e faia na o ufi fofoga e faatasi ona faaaogā na tuuina atu e le MIQF. E tatau ona faatasi lava ona e faaaogāina ufi fofoga nei - e tatau ona fai se ufi fofoga fou i taimi uma e te tuua ai lou potu. Afai ua uma ufi fofoga na o le faatasi e mafai ai ona faaaogā, faafesootai le aufaigaluega MIQF latou te tuuina atu nisi ufi fofoga se tele.

Talofa lava, afio mai!

O loo ta‘ua i lalo nisi o tulafono faigofie ua matou talosagaina e te mulimulitai i ai a o e iai i nofoaga o loo puleaina ai le faanofoesea.

O tulafono nei e tausisia ai le saogalemu o oe ma isi ma taofia ai le pepesi o le COVID-19.

Nofo i totonu o lou potu

E fautuaina lou nofo i totonu o lou potu se‘i vaganā ua moomia ona e alu i fafo. O se faiga e tausi ai lou saogalemu mai le aafia o oe ma taofia ai le pepesi o le COVID-19.

Afai e te faalogoina ua e ma‘i, faamolemole nofo i lou potu ma vili le aufaigaluega a le soifua maloloina o loo galulue i nofoaga nei. O le a latou fautuaina oe i le isi gaioiga e tatau ona e faia.

Fai le ufi fofoga

Fai le ufi fofoga ua tuuina atu ia te oe i taimi uma pe a e fealuai i fafo atu o lou potu, poo taimi e ulufale atu ai se tasi i lou potu mo galuega e fia faaleleia pe faamamā le potu.

Tausi le va e 2 mita

Tausi i le mamao e 2 mita mai isi se‘i vaganā tagata o loo tou 'nonofo faatasi' (lou aiga/toalua).

Faasā le ulufale

Aua e te ulufale i le potu o le faletalimalo a se isi tagata tou te lē o 'nonofo faatasi'.

Last updated: 03 November 2020